أحمد سالم يفتح النار على رابطة الأندية بسبب الأهلي ويوجه لهم رساله صاعقة

فتح أحمد سالم المتحدث الرسمي لنادي الزمالك النار على رابطة الأندية المصرية بسبب قرار الغاء خصم نقاط الاهلي.

وقال احمد سالم عبر قناه الشمس : يا رابطة الانديه جمهور الزمالك بيسأل حضراتكم الثلاث نقاط فين؟ وادارة الزمالك بتسأل حضراتكم اين الثلاث نقاط اللي تخصموا وفقاً للائحة انت اللي اصدرتها وقرار انت اللي اصدرته بمنتهى يعني الحيادية.

وتابع : أنت المفروض حضرتك عديت يوميها ويومين تلاته خلصت الاسبوع طلعت قرارك وقلتلي في الاخر انا هستني قرار لجنة يعني ايه مع احترامنا لقرار اللجنة الاولمبية.

وواصل : جالك قرار اللجنة الأولمبية بأن خصم النقاط واجب.. فجأة صحينا في يوم لقينا حضرتك بتقول لأ ولله احنا لقينا الأهلي كان عنده ظرف قهري.

وشدد : ايه هو الظرف القهري يا رابطة .. ما تطلع يا استاذ احمد دياب ترد علينا وتكلمنا فين الظرف القهري .. ليه هنولع الدنيا وقرار كمان يتأجل بتاع لجنة التظلمات وبنحترمها لأنها بمثابة لجنه قضائية.

وأكمل : ليه النهارده تخلي مشجع يقول هما مستنين يشوفوا وضع المنافسة وترتيب الدوري ليه تسيب المواطن يتخيل إنها بتدار كده وبإمارة ايه حضرتك عدلت القرار .. طلبنا من حضرتك محضر القرار؟ مفيش .. حيثيات القرار؟ مفيش.. طيب مين حضر الجلسه؟ مفيش.

واضاف : الرابطة تقريباً صحيت الصبح فجأة اكتشفت أن في بند الظروف القهرية سحبت قرارك وطلعت قرار تاني في مشهد عمره ما يحصل في قرار غريب وعجيبو والقرار ده مع ترتيب الدوري حاليا بيخلي الاحتقان يزيد بين الجماهير.

وأوضح : قرار تأجيل الثلاث نقاط مش مفهوم واصدارة إلغاؤه اصلا مش مفهوم والتراجع عنه غير مبرر لحد النهارده وعيب مايصحش اللي بيحصل ده تلاعب بمقدارت الكرة المصرية .. هي رياضة اه بس هي بتظبط مود المصريين، يعني في ناس لما فريقه بيخسر بيعيط ولما يكسب كأنه خد ملايين الدنيا .. اهو في جماهير بتشجع لاعب هياخد نص مليار ولا مليار وهو بيكسب 200 جنيه في اليوم فهو على باب الله اي قرار ممكن يقهره أو يفرحه.

واتم : الموضوع بقى فعلا مستفز لأقصى درجه وتأجيله كل يوم بيثير الدهشة أكثر ليه القرار مش بكرة ولا بعده … ده قرار إداري أطبق زي بالظبط على الزمالك الموسم اللي فات، هل في تمييز ولا نادي مميز بعينه .. وأتمنى الرابطة تتراجع عن قرارها قبل اي يفسر غلط حسب توقيته.